اللغة

موضوع النهاردة ممكن مايكونش ليه علاقة اوي بتغير تصرفاتنا للاحسن علي اد ماهو متعلق بالثقافة المصرية. للاسف مع انتشار الانترنت في الفترة اللي فاتت و مع حب الشباب للاختصار ظهرت مصطلحات لغوية خاطئة كثيرة. او انا رأيي ان انتشار الانترنت ساعد علي ظهور المشكلة للعيان لان قبل الانترنت و (الشات) محدش كان بيلاحظها لان الشباب مكنوش بيكتبوا اصلا. و في لغويات و مصطلحات ظهرت من تقليدنا للكلام و اللغات التانية من غير مانفهم معني اللي بنقوله.

هاتكلم الاول علي مصطلحات الكتابة الخاطئة و اللي يمكن من اخطرها (انشاء الله) و (والهي) طبعا مش محتاج اكتب الكتابة الصحيحة لكن هاتكلم عن المشكلة بصفة عامة. (انشاء الله) ظهر و الناس بتكتبه لانهم مش فاهمين لغتهم و مش فاهمين معني كلمة (ان شاء الله) و ان دي معناها (اذا اراد الله) و بيكتبوها زي ما بيقولها من و هما صغيرين و اللي طبعا بتبقي خطأ كبير لان في فرق بين (انشاء) و (ان شاء) و الاولي بمعني (بناء و تصنيع) و طبعا ماينفعش الجملة دي نشوفها كتير لان معناها خاطئ بشكل كبير.

الكلمة التانية و اللي بيستخدموها للحلفان و بيقولوها برده زي ما بينطقوها من صغرهم و هي (والهي) و القصد (والله) و هو تعبير القسم او الحلفان.

طبعا انا مش هاتكلم عن الاخطاء الاملائية الكتيرة اللي بنواجها و بنشوفها من خلال تعاملنا مع اي شخص علي الانترنت و ده طبعا يرجع الي التعليم و خلافه و مش هانتكلم علي التعليم لان مش موضوعنا و مهما قلنا مش هانعرف نغيره في الوقت الحالي بس هاتكلم عن حلول اي شخص ممكن يعملها و المفروض انه يعملها و ان الاباء يهتموا بذلك اﻻ و هي الثقافة.و انا اعني بالثقافة ان التعليم مش كل شئ لأن العلماء و المصريين اللي بيعرفوا يكتبوا بشكل صحيح كانو في نفس المدارس و نفس التعليم و لكن الفرق هنا في الثقافة الشخصية و كثرة القراءة في اي موضوع و اي نوع سواء الجورنال اليومي او المجلات المختبفة ابتداءا من مجلات الاطفال و التي تساعدنا و تساعد اطفالنا علي معرفة طرق الكتابة الصحيحة و ايضا علي سرعة القراءة.

المصطلحات التانية هي اللي ظهرت بتقليدنا لكلمات اجنبية بلا فهمها و بالتالي تحريفها او نطقها بشكل خاطئ. مثل كلمة (كانز) و (موديلز) و غيرهم. المشكلة ان لما الواحد بيصحح الخطأ ده لاي حد بيضحك عليه و كأن ان الصح مالوش لازمة او ان الشخص اللي بيحاول يصحح الخطأ ده (بيتنطط عليه) و طبعا ده بيؤدي الي ظهور مصطلحات كثيرة خاطئة.

انا معرفش اي الحل او الطريقة اللي ممكن تحل المشكلة دي. معرفش اصلا دي مشكلة وﻻ ﻻ بس من وجهة نظري فهي مشكلة.

هدف المدونه

هل الهدف اننا نصحي الصبح نلاقي مصر بقت احسن؟ هل الهدف اننا نغير الواقع المصري؟ هل الهدف اننا نوفر "كتيب" علشان المصري يمشي علي قواعده و يطبق نظرياته؟

انا مش هاكدب و اقول اني عارف ايه الهدف وراء انشاء المدونه و لكن انا متأكد من سبب انشائي لها. انا يمكن تكون دي اول مرة ادون فيها بس حسيت اني محتاج اني اوصل او علي الاقل اشارك الناس تفكيري لاني متأكد ان في ناس و مصريين كتير عندهم نفس الافكار بس مش عارفين يوصلوها لغيرهم ازاي. انا مش حاطط هدف اوصله علشان اقول اني نجحت لان النجاح حاجة نسبية خصوصا في حالة كحالة المدونه دي. انا في النهاية احب اقول ان لو انسان مصري حس انه لازم يعمل حاجة او اتعلم من المدونه هايكون هو ده النجاح بالنسبة لي.

النظام

ايه هو النظام و هايفرق في ايه؟
النظام هو اننا نعمل كل حاجة بترتيب و احترام و مسئولية. اننا مانقولش هانفرق ايه وﻻ ليه. النظام هو اللي بيفرق بين الدول المتقدمة و دول العالم الثالث.
عندنا في مصر مشكلة نظام لأننا ببساطة شعب فهلوي و بنعتز بفهلوتنا. و دي مش حاجة عيب دي ثقافة عندنا. لكن ابتدت تاخد محور تاني و هو ان الفهلوة بقيت بتأثر علي العلاقات بين الناس و بعضها بمعني بقت الفهلوة اسلوب تعامل المصريين مع بعض خصوصا اللي مايعرفوش بعض في الشارع او في المحلات او في حتة.
نرجع تاني للنظام. فالنظام مش معناه اننا نعقد حياتنا او هانعمل حاجات مختلفة. النظام حاجات بسيطة هانعملها في تعاملتنا هاتفرق كتير من غير اي جهد. فمثلا مشكلة الطوابير علي اي حاجة و لو لسبيل المثال علي تذاكر المترو. بنلاقي ناس واقفة طابور قدام الشباك و لكن بقدرة قادر بنلاقي في 4 طوابير تانية من كل الجهات و بنلاقي الناس اللي فاكرة انها اشطر و اذكي من الناس اللي واقفة في الطابور و بتدخل علي الشباك من الجمب و تاخد تذكرتها و تمشي و لا كأن في اي طابور و المبرر ان الطابور بياخد وقت كتير... طيب نفكر ليه بياخد وقت طويل؟؟ علشان في ناس كتيرة بتاخد التذاكر و هما مش واقفين في الطابور علشان كدة الطابور مابيتحركش. لكن لو الكل وقف في الطابور كل واحد هايقف بالكتير 30 ثانية و الدنيا هاتبقي منظمة اكتر.

طيب مثال تاني قريب. طبعا كلنا بنركب المترو و في الفترة الاخيرة حددو ابواب للطلوع و النزول. لان الناس كانت بتتداس و بيزقوا بعض وﻻ كأننا بشر وﻻ مصريين وﻻ نعرف بعض و كل واحد بيقول يللا نفسي. هل لو طلعنا من ابواب الطلوع و نزلنا من ابواب النزول هانتعب؟ المسافة تقريبا بين كل باب و باب 5 متر اكيد مش هانتعب لما ننزل و تطلع من الباب الصحيح.

مشكلة نظام تانية كبيرة جديا و نفسي يبقي ليها حل في مصر.. المهملات و الناس اللي بترمي الورق و الشنط و غيره في الشارع مشكلة كبيرة جدا و المشكلة دي سببها 3 انواع من الناس. النوع الاول و هي طبعا اللي مش فاهم اي حاجة و فاكر انه لما يرمي حاجة في الشارع مش هاتسببلوا اي مشكلة او اذي و ده طبعا تفكير خاطئ. النوع الثاني هو النوع اللي بيبقي ماشي مع واحد محترم ويشوفه ماسك ورقة في ايده و بيدور علي سلة مهملات (اللي صعب برده تلاقيها) و يروح قايله يا سيدي ارمي في الشارع مش فارقة و انت عامل نفسك ..... و الكلام يستمر و اعتقد ان اي واحد فينا بيحب يرمي الحاجة في مكانها و مش في الشارع سمع كلام من ده من اصحابه او غيره. النوع الثالث او بمعني اصح السبب التالت هما عمال النظافة في مصر و اكيد كلنا لاحظنا ان لما بنحاول نرمي حاجة في سلة المهملات و ندور علي السلة و بعد ما نلاقيها بنلاقيها مفتوحة من تحت يعني مالهاش لازمة...

الامثلة كتير و اكيد هانتكلم عليها بالتفصيل و علي حلولها و ده بس كان مقدمة للنظام و كلامنا اللي جاي.

علشان تبقي احسن

بسم الله الرحمن الرحيم

علشان تبقي احسن مدونة جديدة هاحاول من خلالها توصيل افكاري و افكار غيري لتحسين نفسنا علشان تبقي مصر احلي و احلي. بعيدا عن السياسة و اتهام الغير لازم نغير من تصرفاتنا و حياتنا بتغيرات بسيطة جدا هنلاقي مصر و حياتنا اختلفت.

لازلنا في البداية و بدأنا مشوار الالف ميل و باذن الله يوفقني و يلهمني الكلمات لاعبر لكم عما بداخلي و عما بداخل شباب مصر لنتحسن.